सड़क पार करत मुर्गी के पुलिस हिरासत में लेलस

सड़क पार करत मुर्गी के पुलिस हिरासत में लेलस

एगो हैरान करेवाली घटना में पुलिस एगो मुर्गी के हिरासत में ले लेलस। मुर्गी के गलती रहे कि उ भीड़भाड़ के समय सड़क पार करत रहे। ए मामला में पुलिस के कहनाम बा कि मुर्गी भीड़भाड़ वाला समय में बीच सड़क प ऐने-ओने कुदत रहे।

हंसी मत, इ मज़ाक ना ह। हालांकि यूनाइटेड किंगडम (यूके) में डंडी के ईस्ट मार्केटगेट इलाका में भईल इ घटना सभके हैरान जरूर कईले बिया। पुलिस के कहनाम रहे कि सड़क से आवत-जात वाहन चालक ओकरा के ए मुर्गी के बारे में सूचना देले रहले।

तेसाइड पुलिस डिवीजन के एगो पुलिस अधिकारी के हवाला से ब्रिटिश अखबार मिरर कहलस कि "मुर्गी आवत-जात ड्राईवर के चिंता के विषय बन गईल रहे।" सूचना मिलला के बाद अधिकारी उहाँ पहुंचले अवुरी मुर्गी के पकड़ के थाना में ले अईले।

फ़ेसबूक प पुलिस के ओर से जारी एगो बयान के मुताबिक "जानवर के खिलाफ हिंसा के रोकथाम खाती बनल 'द स्कॉटिश सोसायटी फॉर द प्रीवेन्शन ऑफ क्रूरिटी टू एनिमल' से पुलिस संपर्क सधले बिया अवुरी मुर्गी के देखभाल कईला के संगे-संगे ओकरा मालिक के तलाश कईल जाता।"

पुलिस अधिकारी आम जनता से ए मुर्गी के मालिक के तलाश में सहयोग के मांग करत पुछले कि "पुलिस जानल चाहतिया कि मुर्गी सड़क के काहें पार करत रहे।"

तेसाइड पुलिस के ए फ़ेसबूक पोस्ट प हजारों लोग के कमेंट आईल लेकिन केहु इ ना बतावे पावल कि ए मुर्गी के मालिक के ह अवुरी इ मुर्गी सड़क काहें पार करत रहे। कुल मिलाके पुलिस के तमाम कोशिश ए मामला में नाकाम होखत देखाई देता।

  • Share on:
Loading...