धर्म के नगरी में अधर्म, सामूहिक बलात्कार के बाद महिला के हत्या

धर्म के नगरी में अधर्म, सामूहिक बलात्कार के बाद महिला के हत्या

प्रधानमंत्री नरेंद्र मोदी के लोकसभा क्षेत्र अवुरी धर्म के नगरी बनारस में एगो अधेड़ उमर के महिला के दु लोग अपना हवस के शिकार बनवले अवुरी विरोध कईला प ईंटा-पत्थर से कूँच-कूँच के मुआ देले।

सूचना के मुताबिक बनारस के बड़ागांव थाना क्षेत्र के लोकापुर गांव में बुधवार के सबेरे जब गांव के लोग शौच खाती घर से निकलले त गांव के बहरी बनल हनुमान जी के मंदिर के नजदीक एगो महिला के नाग-धड़ंग लाश देखले।

लाश होखे के खबर फैलते आसपास के लोग भारी संख्या में उहाँ जुट गईले अवुरी पुलिस के सूचना देले। सूचना मिलला के मौका प पहुंचल पुलिस लाश के अपना कब्जा में लेके पोस्टमार्टम खाती भेजवा देलस अवुरी खोजी कुत्ता के मदद से जांच शुरू क देलस।

खोजी कुत्ता से मिलल जानकारी के आधार प पुलिस लक्ष्मीनिवास मिश्रा उर्फ डब्बू (45 साल) आ कल्लू गौड़ (50 साल) के गिरफ्तार क के जब पूछताछ कईलस त दुनो आपन गुनाह कबूल क लेले।

पूछताछ के दौरान आरोपी बतवले कि मरेवाली महिला दिमागी तौर प बेमार रहे अवुरी उ लोग एकरे फायदा उठावत ओकरा संगे दुष्कर्म कईले अवुरी बाद में जब महिला विरोध करे लागल त पोल खुले के डर से ईंटा-पत्थर से कूँच-कूँच के ओकर हत्या क देले।

पुलिस फिलहाल दुनो आरोपी के गिरफ्तार क के जेल भेज देले बिया अवुरी मामला के जांच कईल जाता।

  • Share on:
Loading...